மழையாவது

முன்பு பெய்த மழை 

நதியானது என் பால்ய  

கப்பல்களை மிதக்க வைத்து  

பின்னொருமுறை 

பெய்த மழை 

கவிதையானது 

என்னோடு அவளையும் 

நனைக்க வைத்து 

மீண்டுமொருமுறை பெய்த 

மழை சனியன் ஆனது 

என் வேலை நேர்முகத்தை 

தவற வைத்து 

அதற்கடுத்த முறை 

பெய்த மழை 

இரக்கமற்றவன் ஆனது 

சாலை ஒன்றில் என் 

வாகனத்தை செயலிழக்க 

வைத்து 

இந்தமுறை பெய்த மழை 

மத்தாப்பானது 

மகளின் சின்னஞ்சிறு

கைகளில் தெரித்து 

அவசரஅவசரமாக அவளிடம்

மழையை மழையாகவே

எப்போதும் ரசிக்க 

சொன்னேன்

அவள் காதில் வாங்கவில்லை 

கைகளில் 

ஏந்தி கொண்டிருந்தாள் மழையை !!!